La única condición puesta pol PP riosellanu pa la so aprobación, la baxada del IBI en 2018, ye materialmente irrealizable polos plazos llegales esixíos.
Nel momentu d’aquella “negociación”, dende Pueblu yá argumentábamos qu’aquello de la baxada del IBI en 2018 como “una esixencia, una llínea collorada” per parte del PP pa l’aprobación del presupuestu de 2017, amás de nun tener sentíu, pues nun repercutía nel citáu presupuestu (la baxada de los impuestos de 2018 va repercutir nel presupuestu de 2019), sonaba a brinde al sol difícilmente executable.
Poro, yá sabemos oficialmente, tres d’una consulta fecha a Intervención municipal, que nes feches nes que tamos yá, nun ye posible realizar cambéu dalgunu nes Ordenances fiscales pa poder cumplise la “llínea collorada popular”, dau que se necesitaríen práuticamente 50 díes ente los estremaos plazos pa qu’entraren a valir los citaos cambeos; y tolo que nun tea de magar el día 1 de xineru de 2018 nun va ser efectivu yá hasta’l 1 de xineru de 2019. Ye dicir, que la citada baxada, d’afectar a unos presupuestos, afectaría a los de 2020.
Énte esta situación nun hai otra que denunciar públicamente dos situaciones a cada cual más esperpéntica:
– D’un llau l’inexistente curiáu y celu per parte del PP de Ribeseya nel supuestu obligáu cumplimientu de la so “única” y peculiar llínea collorada qu’en nengún casu diba afeutar al presupuestu de 2017. El PP dio’l so sofitu totalmente “gratis” al presupuestu de Foru de 2017, esto ye, non solo’l so sofitu nun sirvió pa modificar en nada’l citáu presupuestu, sinón que la única condición puesta pa sofitar el mesmu, que nada tenía que ver col presupuestu n’alderique, tampoco se va ver realizada.
– D’otru llau, l’equipu de gobiernu de Foru, nuevamente pásase pel arcu del trunfu un alcuerdu con una formación política local. La xugada salió-y maestra, si dexamos a un llau la ética, la honradez y la franqueza de la que tou bon gobernante debe de facer gala. Nel meyor de los casos, de producise una baxada de los ingresos del IBI en 2019, va ser un nuevu equipu de gobiernu, y non ésti, el que tenga que batese’l cobre pa caltener l’equilibriu presupuestariu en 2020.
Pela nuesa parte y a la espera de recibir el proyectu presupuestariu pa 2018, vamos siguir trabayando nelli, col mesmu rigor y enfotu que nos anteriores, eso sí, cola rocea propia del que sabe que namái va poder sofitalos cuando los posibles alcuerdos a los que pudiera llegase seyan sobro coses bien tanxibles, pa evitar incumplimientos como nos qu’incurrió Foro nel alcuerdu presupuestariu 2016 con Pueblu, siendo siempres el primer requisitu pa futures negociaciones, que se cumpla lo roblao en 2016.
Emponderada señora Fernández, darréu de lleer les sos declaraciones, y como yo nun tengo l’altavoz mediáticu qu’usté tien, decidíme a escribi-y esta carta abierta cola esperanza que d’una manera o otra llegue a les sos manes.