CARTA ABIERTA DE RICARDO CANGAS A MERCEDES FERNÁNDEZ GONZÁLEZ. PRESIDENTA DEL PP D’ASTURIES
Emponderada señora Fernández, darréu de lleer les sos declaraciones, y como yo nun tengo l’altavoz mediáticu qu’usté tien, decidíme a escribi-y esta carta abierta cola esperanza que d’una manera o otra llegue a les sos manes.
Diz usté que probablemente fale más asturianu que Concha o Gaspar yá que ella y elli son de Burgos y Logroño respectivamente, bien, yo soi de Madrid, y nací ellí por causa de la inmigración forzosa, debida a la falta d’oportunidaes llaborales qu’había n’Asturies, eso que la so collacia, la señora Báñez llama movilidá esterior.
La cooficialidá del asturianu nun supón una amenorga nos derechos del que nun lo fala y sí una reconocencia de los derechos d’aquelles persones que sí lo faen, too eso qu’usté considera un gastu, yo considérolo una inversión. Una inversión en cultura, una inversión n’igualdá, una inversión na reconocencia y recuperación de los nuesos usos y vezos, que gracies a persones como usté y a partíos como’l qu’usté preside fuéronse perdiendo adulces.
Amás confúndese usté, quiero pensar que por desconocimientu, cuando se refier al descomanáu gastu que van tener que realizar les alministraciones y organismos asturianos n’afitar la cooficialidá, porque refuga usté falar de que toles comunidaes con idioma oficial, reciben per parte de l’Alministración Central tresferencies especiales pa dellos aspeutos, amás tamién el llamáu coeficiente de pluralidá llingüística, qu’en Galicia supon 35 millones d’euros
añales.
Pensaba escribi-y esta carta en castellán, pero viendo’l so autoreconocíu dominiu del asturianu, decidí facelo nesta llingua. Eso sí, pa poneme al so altor encamente-y a un collaciu espertu na tema un gabitu, nun vaiga ser que nun lo entienda usté.
Arrano por que se recupere d’esi trestornu bipolar que-y fai ser xenófoba y endófoba nunes mesmes declaraciones.
Un saludu.
Ricardo Cangas García
