Turbidez agua de Sardéu y arreglu de tubería

Anque dende llueu nun ye la meyor solución, nos últimos años, pa salir del pasu del problema de turbidez de l’agua en Sardéu, dempués d’unos díes d’agua, bombiábase más agua al depósitu de Calabrez, pa poder asina abastecer dende ésti a Sardéu, evitando la captación de la Cuesta de Moru que cuando llueve siempres provoca esti problema.
Nel ultimu plenu pidimos que nos esplicaren les declaraciones del alcalde Ramón Canal, diciendo que l’arreglu de la tubería que conecta la captación de l’agua de Calabrez col depósitu taba pindiu de tener disponibilidá económica presupuestaria. Cuando según los Pliegos d’axudicación del serviciu, esta obra paez claro que la so execución ye responsabilidá de la empresa que resultó axudicataria.
Pa la nuesa sorpresa tanto l’alcalde como’l conceyal d’Obres negaron la mayor, diciendo que tábamos conxeturando y qu’amás afirmábamos ensin fundamentos, que la empresa axudicataria nun diba acometer la obra. Pa dexar claro’l motivu de la nuesa entruga al final del vídeu estractamos les declaraciones del alcalde a la emisora local de la CADENA COPE, pa que dempués d’escuchales que cada quien saque les sos propies consecuencies.
Pueblu a día de güei, reafírmase nes duldes que tenía antes del plenu, y vamos a mantenenos vixilantes, pa que si nun-y correspuende como paez al conceyu correr con esta obra, de les arques municipales nun sala un solu céntimu pal arreglu d’esta avería, eso sí esixendo tamién que nun se dilate más nel tiempu.