Les razones d’un NON al Presupuestu 2024

Nel Plenu Ordinariu celebráu el 20 de marzu de 2024 votamos escontra del proyectu presupuestariu que se nos presentó y ficímoslo por distintos motivos y nengunu d’ellos ye bloquiar el Conceyu, ye más tenemos el convencimientu de que’l Conceyu va bloquiase col proyectu aprobáu, estos son dalgunu de los motivos:

• L’Equipu de Gobiernu, refugó la posibilidá de conocer les aportaciones que pudiéramos realizar, cortándose con ello la posibilidá de que se reflexara nos presupuestos la sensibilidá de tola sociedá ribeseyana.
• La primer oportunidá que tuvimos de solventar duldes con respectu al proyectu presupuestariu foi na C.I. de Facienda celebrada el 14 de marzu , en dicha comisión non yá nun se respondió a nenguna de les nueses duldes, si non qu’ensin nin siquier escuchales “convidósenos” a presentales por escritu
• Qu’una vegada presentáu l’escritu coles duldes el mesmu día 14, nun tuvimos respuesta al mesmu hasta el día 20 a les 15:47 ye dicir 4 hores y 13 minutos antes del Plenu .
• Qu’en dichu presupuestu hai una amenorga de más de 100.000€ en víes y caminos municipales, conclusión a la que llegamos yá que, una vegada preguntáu el motivu del amenorgamientu , nes respuestes recibíes a cencielles niégase qu’asoceda, pero nun s’esplica en que partíes tán previstos los fondos pa eses actuaciones.
• Qu’en el Capítulu II Gastos Corrientes en Bienes y Servicios, que tien una dotación presupuestaria de 5.930.875,12€, lo que supon casi un 60% del presupuestu, observamos una incapacidá de xestión enorme y vamos poner namá un exemplu d’ello, anque hai munchos más. No previsto nel presupuestu pal caltenimientu del allumáu públicu , presupuéstase la cantidá base del preciu de llicitación, cuando yá se sabe l’importe al que s’axudicó y ye de casi 90.000€ menos. Fondos que podríen dedicase a otres actuaciones y qu’agora pasarán de xuru al remanente de tesorería al rematar l’exerciciu.
• Que se dexa ensin dotación presupuestaria a tou lo referíu a Bonos d’ayuda al arriendu pa xente moza, presupuestos participativos, participación ciudadana, grabación y retresmisión de los plenos.
• Qu’en el proyectu presupuestariu nun hai una partida que cunte colos fondos suficientes pa investigar y desenvolver nuevos nichos llaborales.