PUEBLU TA DISPUESTA A REPITIR COMO PROYECTU DE CONFLUENCIA NES ELECCIONES LOCALES DE RIBADESELLA/RIBESEYA
L’agrupación d’electores que xuntó a persones d’estremaes sensibilidaes polítiques, a la izquierda del PSOE, y consiguió dos conceyales na convocatoria de 2015; satisfecha col so llabor a lo llargo d’esti periodu; ratificó na so asamblea d’avientu la so intención de volver a la contienda electoral como candidatura de confluencia.
Nengún otru proyectu políticu llocal xunció tantes sensibilidaes polítiques distintes a la izquierda del PSOE na pasada convocatoria ellectoral de mayu de 2015 en Asturies, como’l de PUEBLU.
Dende l’agrupación local d’IX, a antiguos militantes y cargos orgánicos del PSOE llocal, pasando por soberanistes allegaos a Conceyu Abiertu o Compromisu, inscritos y simpatizantes de Podemos y persones independientes conformaron el gruesu d’esti proyectu en 2015. La irrupción de PUEBLU nel mapa políticu ribeseyanu, supunxo un revulsivu en toa riegla sobremanera no que cinca a la forma d’entender y practicar la oposición política municipal nel conceyu ribeseyanu.
Agora, PUEBLU, ratificó n’asamblea la so intención de repitir en mayu de 2019 como candidatura de confluencia referencial, ya inclusu non descartan ufiertar la so marca y modelu de confluencia a otros conceyos asturianos qu’asina lo deseyen siempres y cuando nestos conceyos se dieren les circunstancias afayadices pa tala fin.
Según palabres del so voceru Ricardo Cangas, “A PUEBLU toca-y agora defender la so realidá como auténticu proyectu d’unidá popular llocal, abiertu plural y asambleariu” y pa ello esperen cuntar con que formaciones como IX, PODEMOS o otres respuendan y sofiten de manera activa esti proyectu”.
Cangas redunda argumentando que “trescurríos trés años dende la entrada de PUEBLU nel Conceyu, y con tolos aciertos y erros que pudiéramos cometer, dende’l puntu de vista electoral consideramos que ye responsabilidá de PUEBLU intentar garantizar que namás esista una Candidatura d’Unidá Popular a la izquierda del PSOE”.
En 2015, l’apaición de la candidatura “Ribadesella si Puede” venceyada a PODEMOS, pero que nun cuntó col aval directu de PODEMOS ASTURIES o la falta de sofitu esplícitu d’IX Asturies a la decisión de l’asamblea local d’IX Ribeseya de sofitar esta agrupación d’electores, supunxeron dos de les principales estorbises pa movilizar al electoráu haza esta recién nacida opción.
Cuatro años dempués PUEBLU considera que la situación camudó meridianamente. “Trabayemos con constancia y rigor, con aciertos y erros, como non; pero siempres con honestidá y col oxetivu únicu de facer oposición constructiva dientro y fora de la mesma institución llocal, col únicu oxetivu de favorecer los intereses de los/es ribeseyanos/es. Poro consideramos que si se dan les circunstancies, independientemente de les persones que conformen la candidatura, el proyectu de PUEBLU ye un proyectu perfectamente vidable para gobernar el nuesu conceyu nos próximos cuatro años”.